٤ آب - مسؤولية حزب الله عن جريمة الحرب / نديم بستاني
٤ آب - مسؤولية حزب الله عن جريمة الحرب
بحسب القانون الدولي الطرف يلي بيخزن اسلحة بالأماكن المدنية، بيكون مسؤول عن جريمة الحرب اذا تم قصف المستودعات ووقع ضحايا من المدنيين.
حزب الله عندو مخزن أسلحة بالمرفأ (مش مصنع)، والنيترات قصف/انفجر من باب خطأ بالمعلومات الاستخباراتية. وهيدا يلي أحدث أثار مدمرة تجاوزت القدرة على تحمل الموضوع دولياً. وليتم تغطية الموضوع ولفلفة القصة تم تحويل الملف من جريمة حرب بحق حزب الله ل ملف إهمال إداري.
موضوع النيترات تفصيلي وجانبي وأما الڤيتو يلي كان مانع ازالتو، هو لأن حزب الله كان عم بيستخدمو لصناعة المتفجرات البدائية برات لبنان، وانلقط كذا خلية لحزب الله حول العالم كانت عم تخزن نيترات من تايلندا لقبرص للكويت لألمانيا والسعودية وبريطانيا وغيرون. ويلي بدو يطلع يتنطح انو الخطأ الإستخباري مستحيل على هيك مستوى، بحب خبرو انو ال CIA أكدولو لشاه إيران قبل ٦ أشهر فقط من انتصار الخميني انو احتمالات الثورة بإيران صفر!! وقبل منها بكم سنة كمان خطأ استخباري خلا الأمركان يفشلو باستهداف الطياران الحربي الكوبي، هيدا يلي تسبب بفشل عملية ازاحة نظام فيدال كاسترو بما عرف بمهزلة عملية خليج الخنازير، وكمان قبلها خطأ استخباري اوقع كارثة بيرل هاربور. الخ…
لنرجع عل الأساس، الأدلة يلي بتحسم تورط حزب الله بالقضية هي إنو:
أولاً، الكل سمع صوت الطيران هيدا النهار؛ اعتراف ترامب اول لحظة بالعمل الحربي؛ تحذيرات نتانياهو بالمواقع المدنية المستخدمة كمستودعات اسلحة وحيث كان المرفأ من ضمنها؛ جولة جبران باسيل الإعلامية الإستعراضية يلي شملت المرفأ للتغطية على حزب الله، وما شابها من بلبلة لناحية تضليل الصحفيين في تلك الليلة؛ وجود جو بجاني خلال تلك الجولة وتصويره مستودعات المرفأ، وقد تم اغتياله بعد تفجير ٤ آب بسبب الكاميرا تبعو؛ تغريدة ل أفيخاي أذرعي قبل عدة أشهر من انفجار مرفأ بيروت، بوجود معلومات عن استخدام حزب الله مرفأ بيروت لتخزين الصواريخ الدقيقة؛ حذف بند الصواريخ الدقيقة من المفاوضات حول الغاز بعد انفجار مرفأ بيروت؛ مغادرة بعثة الإتحاد الأوروبي من مقرها مقابل المرفأ جنب بناية the library, وذلك قبل يومين فقط من انفجار المرفأ؛ سيطرة حزب الله أمنياً على المرفأ قبل وبعد الإنفجار وحيث خلال اللحظات الأولى كان من اللافت التواجد الكثيف لشاحنات الهيئة الصحية.
الطيران الحربي مش ضروري يكون للقصف. يمكن للرصد، وممكن لتدمير الأدلة في حال فشل العملية، وممكن يكون للقصف كمان. الفرضيات مفتوحة حول صاعق التفجير!! الأهم انو الطيران الحربي هو دليل على العمل الحربي بغض النظر عن مصدر الصاعق.
اما نظريات مرفأ حيفا وتدمير مرفأ بيروت المنافس، وباقي اخبار الرز بحليب. هيدي تماماً متل مؤامرة اسرائيل لسرقة مياه لبنان، بالرغم من انو لبنان مركب مضخة على الحاصباني، واسرائيل مش ملتفتة الها!! والجدال محسوم لأن تدمير المرافئ لا يتم بقصف عنبر بل بقصف الحوض وتدمير الأرصفة، لأنو بالحالة المعاكسة ممكن ب عدة اشهر قليلة ان يتم استبدال التجهيزات وعندها رح تجي ادارة جديدة للمرفأ بعد اسوأ من يلي كانت قبل، واذا كان في نتفة توازن لمصلحة المحور المعادي لحزب الله، الأكيد انو بعد اعادة هيكلة الادارة ب ظل نفوذ حزب الله وبظل الدور الفرنسي المتحيز لإيران رح يتم انحدار التوازن اكثر واكثر.
تاني شي، تدمير مرفأ بيروت يصب لمصلحة مرفأ طرابلس وطرطوس وليس بالضرورة مرفأ حيفا، وخاصة انو المرافئ حول العالم بيكون في عندها سعة محددة وما فيها تتخطى ال traffic limit.
ثالث شي، تدمير مرفأ مدني بشكل عدواني دون اي ذريعة عسكرية يجعل اسرائيل مكشوفة، لأن في كتير دول بالعالم رح تكشف الموضوع ضمن لعبة الأمم، وبيخليها عرضة للابتزاز واوراق الضغط. بينما تشارك المسؤولية بين اسرائيل وحزب الله هو يلي مخلي الملف ضمن خانة التكتم الدولي. مثلا شو مانع الأجهزة الأمنية اللبنانية او الايرانية تكشف الموضوع طالما هي صاحبة فعالية وسرعة قصوى بكشف شبكات التجسس الاسرائيلية وغيرها من التحهيزات الامنية التابعة لإسرائيل في لبنان. قديش غريب انو كان كل ما يصير حدث أمني او اغتيال يطلع حسن نصرالله يقول انو اسرائيل مسؤولة، بينما بملف مدهن متل انفجار المرفأ مفروض بيعزز نظرية المقاومة ما جاب حزب الله سيرة اسرائيل بولا حرف!!!
رابع شي، اسرائيل هدفها الاستراتيجي تحقيق السلام مع محيطها، ومن باب اولوياتها عدم استفزاز المجتمعات غير المنخرطة بالصراع ويلي يتم التعويل على مزاجها بغية رفع موازين احتمالات ترتيب السلام. مثلا ليش بحرب تموز تم تجنب استهداف المناطق المسيحية الا من بعض العمليات الجراحية اذا ما تم قياس القصف مع حجم الدمار يلي حصل للأسف في البيئة الشيعية. بالتالي مش ممكن اسرائيل تضحي بالمصالح الاستراتيجية للسلام مقابل بعض الدنانير الاضافية لمصلحة مرفأ حيفا.
والنقطة الأهم هي انو بكل الملفات يلي متورط فيها حزب الله، المنظومة الأمنية القضائية عندها نمط متكرر وثابت وهو الطمس والتمييع والمواربة. وهيدا اكبر دليل على تورط حزب الله بملف انفجار المرفأ من رأسه حتى اخمص قدميه. لدرجة انو القاضي البيطار تم صنع منو محبوب الجماهير بتدبير خبيث من قبل حزب الله يلي قصد يشيطنو ويتهجم عليه بالعلن، بينما البيطار مش موجه اي استدعاء للتحقيق لأي مسؤول من حزب الله بالرغم من توافر كل الشبهات بحقو!!
https://www.facebook.com/nadim.boustany/posts/pfbid02QLDMiCPD1YeVeYJ1jpQwAfvVbMrUoBp9FvUc1u4xTmDfREpaJBTi5uVoeRA3wHCxl
https://www.washingtonpost.com/graphics/world/2020/08/04/photos-show-aftermath-beirut-blasts/
Comments
Post a Comment